sona nasin kulupu
Dystopian Fable in Toki Pona
mama suli li sitelen e lipu pi sona nasin kulupu, li toki e ni: “kepeken nasin ni la kulupu li kama pona”. jan li pilin pona tawa tenpo kama lon lipu mama, li wile pali lon e nasin ni.
jan mute li kama jan lawa, li toki tawa jan ale e ni: “tenpo ni la kulupu li ike. jan o utala tawa lawa majuna, o pali e kulupu sin tan lipu mama”. jan ale li kama utala tawa lawa majuna.
pini la jan li pali e kulupu sin. taso tenpo sin mute la kulupu li kama ike sin. jan li pilin ike. jan mute li kama jan lawa sin, li toki tawa jan ale e ni: “tenpo ni la kulupu li ike. jan o utala tawa lawa majuna, o pali e kulupu sin tan lipu mama”.
jan wan li toki alasa e ni: “taso tenpo ni la kulupu mi li kepeken nasin lon lipu mama. tan seme la ona li kama ike?” jan lawa li toki e ni: “tenpo ni la kulupu mi li kepeken nasin lon ala li tawa nasin ike. tenpo kama la mi mute li tawa nasin lon li tawa nasin pona. jan o utala”. jan ale li kama utala tawa lawa majuna.
pini la jan li pali e kulupu sin. taso tenpo sin mute la kulupu li kama ike sin. jan li pilin ike. jan mute li kama jan lawa sin, li toki tawa jan ale e ni: “tenpo ni la kulupu li ike. jan o utala tawa lawa majuna, o pali e kulupu sin tawa nasin pona tan lipu mama”.
jan wan li toki alasa e ni: “taso tenpo ni la kulupu mi sin li kepeken nasin pona tan lipu mama. tan seme la ona li kama ike kin?” jan lawa li toki e ni: “tenpo ni la kulupu mi li kepeken nasin lon ala li tawa nasin ike. tenpo kama la mi mute li tawa nasin lon li tawa nasin pona lon. jan o utala”. jan ante li toki e ni: “lon la sona mama li ike. kulupu sin ale li kama ike tan ni”. jan lawa li toki e ni: “ona li majuna o weka”. jan majuna li weka. jan ale li kama utala tawa lawa majuna.
pini la kulupu ale li pakala.