tawa kulupu pipi

lili nanpa wan

tomo pipi la, pipi mama li toki tawa pipi lili mute e ni: “lili mi o. sina mute o pali pona! sina pali pona la, kulupu li kama pona! tawa pipi ale, tawa kulupu ale o!”. pipi lili mute li sona.

pipi mama li toki sin e ni: “mi moli la, sina o alasa o lukin e lipu mi. lipu mi li sitelen e tenpo pini mi, e sona mi, e pali mi. sina o sona a!”. pipi lili mute li sona.

suno sin la pipi mama li moli. pipi lili mute li kama tomo mama, li alasa e lipu mama li lukin. lipu mama li toki e ni: “tenpo pini mute la, pipi mute li ante li kama sin e ma pipi. ona li utala tawa lawa ike, li pona e kulupu. tawa pona kulupu la, pipi mute pini li lape ala, li pali mute, li pana sona, li kama epiku”. sitelen mute li lon lipu ni, li sitelen e ni: “pipi pini mute li pali kepeken wawa suli”.

pipi lili mute li pini lukin la ona li toki e ni: “epiku o… pali pona o… tawa kulupu o!”. tomo li open. pipi pali tan lawa li kama, li toki e ni: “pipi sin o! sina kama pipi pali! o kama tawa kulupu o!”. pipi lili mute li toki e ni: “tawa kulupu o!” kin.

pipi lili mute li kama pipi pali, li pali mute kepeken wawa mute, tawa kulupu. ona li jo e moku lili taso. taso ona li sona e ni: “ni ale li tawa pona kulupu”.

suno mute sin la, pipi lili wan li pali pi pona mute. pipi pali tan lawa li kama, li toki tawa ona e ni: “pipi o! sina pona mute a! sina kama pipi lawa sin. suno kama la o kama tomo lawa!”. pipi lili li kama pilin pona. pipi ante li toki tawa ona e ni: “pona a! sina o pali pona lon lawa, tawa kulupu a!”. pipi ale li pilin pona tan ona.

suno sin la pipi lili li kama tomo lawa. pipi lawa ante mute li lon tomo suli ni, li suli sama ko, li lukin tawa pipi pali lon insa tomo ala. pipi lawa wan li toki e ni: “pipi pali li pona a! ona mute li pali tawa mi mute. suno pini la mi moku e kasi suli suwi a!”. pipi lawa ante li musi li kalama.

pipi lili li sona ala, li toki alasa e ni: “taso mi mute li pali tawa kulupu, anu ala?”. pipi lawa ante li pini kalama. pipi lawa wan li toki e ni: “ni li lon a! taso sina o sona… mi mute li kulupu, kulupu li mi mute. pipi a! ni li lon ala lon?”. pipi lawa ante ale li kalama e ni: “lon a!”.

pipi lili li sona ala. pipi lawa li kama tawa ona li toki e ni: “pipi sin o! o pilin ala e ijo mute! o moku e ni!” li pana e kasi suli tawa ona. pipi lili li pini e ona, li toki e ni: “ala! mi moku ala! pipi pini li pali mute tawa pipi ale, sina ken ala kepeken pipi tawa pona sina taso!”.

pipi lili li weka. pipi lawa li toki e ni: “pipi sin o. toki sina li lon. taso sina pipi lawa. tenpo kama la, sina sona”.

lili nanpa tu

suno sin la, pipi lili li kama tomo lawa, li pali. ona li pilin e ni: “mi o pona e kulupu pi mi mute!”. ona li lukin e lipu mute tan pali. ona li alasa e lipu wan li lukin.

pipi lili li pini lukin la, ona li ken ala pilin e ni: lipu ni li lon. moku li jo e namako. moku li ken lon lon tenpo mute tan namako ni, taso ona li kama pakala tawa sijelo.

tenpo moku li kama. pipi lili li kama tomo moku, taso li wile ala li pilin monsuta. pipi lawa ante li kama, li toki e ni: “sina lukin e lipu, lon ala lon? o pilin monsuta ala. moku tawa pipi lawa li jo ala e namako”. pipi lili li lukin tawa ona li toki e ni: “sina mute li ken ala pali e ni! ona li pipi kulupu kin! pipi pini mute li pali tawa ni ala!”.

pipi lawa li musi li kalama. ona li toki e ni: “pipi o. sina o sona. pipi anpa li utala ala tawa mi mute la, ale li pona. pipi li mute, li wile e moku mute, li wile e namako ni tawa moku mute. ni li pona tawa ale”. pipi lili li toki e ni: “o pini!” li weka.

suno sin la, suno ni li suno lape. pipi lili li kama tomo ona. pipi ante li lon tomo ona kin, li pipi pona ona. pipi ante li toki pona tawa pipi lili. ona mute li moku. taso pipi lili li lukin e moku li ken ala moku. pipi ante li sona ala li toki alasa. pipi lili li ken ala toki.

pipi lili taso li kama tomo lili ona. ona li pilin pakala. pini la, ona li lape lon supa lape.

lili nanpa tu wan

suno sin la, pipi lili li kama tomo lawa. ona li pilin pakala. pipi lawa li kama sin li toki e ni: “pipi o. sina sona lon anu ala? sina pilin e seme? sina sona, anu sina awen?”. pipi lili li toki ala. pini la, ona toki e ni: “…mi awen”.

pipi lawa li toki e ni: “…pona”. pipi pali tan lawa li kama, li kama insa tomo ala e pipi lili. pipi lili li sona ala li ken ala weka.

insa ala la, pipi pali li anpa e pipi lili, li kalama suli. pipi ante mute li kama. pipi lawa li kama li toki kalama e ni: “pipi ale o! o lukin tawa pipi ni. ona li kama lawa sin, taso li awen ala li ike e kulupu!”.

pipi wan li toki alasa: “seme?! taso… ona li pipi pona mi…” taso pipi ante li toki e ni: “ala! tenpo ni la, ona li pipi ike, li pipi pona ala!” pipi ante li kama toki pakala e pipi lili.

pipi lawa li toki kalama e ni: “pipi ale o! pipi sama ona li ike, li pakala, li jaki tawa kulupu, lon ala lon a?!” pipi ante li kalama: “lon a!” pipi lawa li awen toki e ni: “ona o moli!” pipi ante li kalama e ni: “o moli!” kin.

pipi ale li kalama li toki pakala e pipi lili. pipi lili li pilin pakala ale li ken ala toki. tenpo pini la, pipi lili li wile pona e kulupu. taso pini la, kulupu ale li moli e ona.

pini.